» In English » Castellano » Português

Bandeiras históricas da Bretaña Contidos nesta sección: » Bandeira nacional da Bretaña » Bandeira histórica do Ducado da Bretaña » Bandeira histórica da Cruz Negra da Bretaña Visita tamén estas páxinas: » Bandeiras nacionais e históricas dos países celtas » Bandeiras históricas e comarcais galegas

Bandeira nacional da Bretaña A bandeira da Bretaña, coñecida co nome de Gwen ha Du (Branca e Negra) no idioma bretón, é unha bandeira moderna cuxo deseño está inspirado nas cores históricas bretoas e na feitura da bandeira dos EUA como símbolo de liberdade e democracia. O cantón de peles de armiño é a bandeira histórica do Ducado da Bretaña, e as nove barras horizontais representan ás dióceses tradicionais do país, correspondendo as cinco barras negras ás dióceses de idioma Galó (Dol, Nantes, Rennes, Saint-Brieuc e Saint-Malo) e as catro barras brancas ás dióceses de fala bretoa (Cornouaille, Léon, Trégor e Vannes). A bandeira foi orixinalmente deseñada ano 1923 por un membro da organización bretonista Breizh Atao ("Sempre Bretaña") e a partir dos anos 60 comezou a consolidarse na sociedade como a bandeira oficial bretoa.

Bandeira histórica do Ducado da Bretaña O escudo de armas e bandeira do Ducado e casa ducal da Bretaña consiste nun campo de peles de armiño sobre un fondo branco. As armas e bandeira do antigo Ducado orixinaron nas armas dos duques da dinastía dos Capet, que gobernaron o país nun periodo de prosperidade económica e política entre 1212 ata 1532, data na que o Ducado de Bretaña foi incorporado ao Reino da Franza. O emblema ducal das peles de armiño máis antigo que se conserva é o dun selo do ano 1318. Durante os case tres séculos de goberno dos Capet, o estandarte das peles de armiño converteuse na enseña nacional do Ducado da Bretaña. Despois da incorporación da Bretaña á Franza no ano 1532, o uso da bandeira do antigo Ducado decaiu mais non desapareceu completamente. Igual que o Santo Graal do Reino galego, as armas históricas do Ducado utilizáronse ocasionalmente nos Séculos Escuros bretóns para representar a provincia francesa da Bretaña en heráldica, mapas, ou estandartes militares provinciais. Os Bretonistas de comezos do séc.XX promocionaron a bandeira tradicional da Bretaña como parte do seu traballo de recuperación da cultura e historia bretoa, mais eventualmente a enseña que acabou converténdose en bandeira bretoa moderna foi a actual bandeira das barras e armiños.

Bandeira histórica da Cruz Negra da Bretaña A bandeira histórica da cruz do Ducado da Bretaña, tamén coñecida como Kroaz Du (Cruz Negra) no idioma bretón, consiste nunha cruz de cor negra sobre fondo branco. Esta é unha bandeira de orixe relixiosa, ao igual que as cruces de San David de Gales, Sant-Iago da Galiza, ou San Patricio da Irlanda. As primeiras referencias conservadas sobre esta bandeira histórica datan do séc.XV, mais suponse que a orixe da Cruz Negra remóntase polo menos ás Cruzadas do séc.XIII, cando o Papa Gregorio concedeu o uso destas cores aos cabaleiros bretóns como identificativo de seu para distinguir aos continxentes nacionais participantes nas Cruzadas. Os historiadores estiman que a Cruz Negra tivo un uso semioficial xunto á bandeira do Ducado ata a incorporación da Bretaña na Franza en 1532, cando os símbolos bretóns cairon en desuso.

Voltar á Páxina Principal