» In English
» Castellano
» Português

GalesBandeiras históricas de Gales

Contidos nesta sección:
» Bandeira nacional de Gales
» Bandeira histórica da Cruz de San David
» Bandeira histórica do Príncipe de Gales Owain Glyndwr

Visita tamén estas páxinas:
» Bandeiras nacionais e históricas dos países celtas
» Bandeiras históricas e comarcais galegas


Bandeira nacional de Gales Bandeira nacional de Gales

A bandeira galesa chámase Y Ddraig Goch (O Dragón Vermello, en galés) e consiste nun dragón pasante vermello sobre un campo branco e verde. Éunha bandeira recente, oficializada no ano 1959, aínda que baseada en símbolos históricos anteriores.

As bandas branca e verde do campo da bandeira actual foron tomadas das cores da Casa dos Tudor, a dinastía real galesa que gobernou o Reino da Inglaterra de 1485 a 1603. O dragón vermello é o símbolo nacional de Gales máis antigo, cuxas referencias literarias como símbolo de Gales encóntranse xa na Historia Brittonum escrita no século IX.

A teoría mais aceitada sobre a orixe do dragón en Gales conta que este símbolo figuraba nun estandarte Draco do exército román que foi deixado na Cambria, e que logo foi adoptado e reutilizado a partir do século V como bandeira de guerra dos britóns galeses. Nese mesmo século, as tropas románs tamén deixaban Gallaecia e, se cadra, un dragón dos seus estandartes militares foi daquela adoptado e reutilizado como bandeira de seu polos novos monarcas suevos de Gallaecia.


Bandeira histórica da Cruz de San David, Santo Patrón de GalesBandeira histórica da Cruz de San David, Santo Patrón de Gales

A bandeira de San David, santo patrón de Gales, consiste nunha cruz amarela sobre fondo negro.

Esta é unha bandeira histórica de orixe relixiosa que ás veces se utiliza como bandeira alternativa para representar a Gales, de xeito homólogo á nosa Cruz de Santiago galega ou á Cruz de San Patricio irlandesa.

A bandeira de San David popularizouse en Gales recentemente, durante o séc.XX, mais os historiadores concordan que as cores amarela e branca para representar este santo xa se utilizaban en Gales no séc.VII. Na actualidade, esta bandeira pódese ver regularmente en Gales en eventos folclóricos ou deportivos, e sobre todo durante as celebracións do Día de San David, o día da patria galesa.

Igual que San Martiño de Dume, o San David de Gales (ca.500-589) era un crego austero que gañou a santidade grazas á súa longa campaña contra o celto-cristianismo autóctone. O que na Gallaecia era o Priscilianismo, na Britannia era o Pelagialismo. Pelagius (Paio ou Pelaio en galego, nome moi extendido pola Gallaecia durante a Baixa Idade Media) era un popular monxe britón do séc.V que foi acusado de herexe pola Igrexa Román por ter incorporado credos tradicionais atlánticos á nova relixión Cristiá. A longa loita que San David levou contra o Pelagialismo galés terminou por convertelo en Santo Patrón de Gales no santoral oficial católico. A súa Catedral, construída na fisterra galesa, converteuse nun importante centro de peregrinaxe durante a Idade Media.


Bandeira histórica do Príncipe de Gales Owain GlyndwrBandeira histórica do Príncipe de Gales Owain Glyndwr

A bandeira de Owain Glyndwr consiste en dous leóns rampantes dourados sobre fondo vermello e dous leóns rampantes vermellos sobre fondo dourado.

Esta bandeira era o estandarte heráldico de Owain Glyndwr (ca.1354-ca.1416), un nobre galés comparable ao Pardo de Cela galego.

Glyndwr era descendente das principais casas nobres de Gales, e no ano 1400 liderou a causa soberanista galesa contra o rei Henry IV da Inglaterra, frente o cal eventualmente foi derrotado. Se o príncipe Glyndwr tivese gañado a guerra contra Inglaterra, o seu liderazgo e orixes nobres teríano confirmado como Rei de Gales, mais o seu fracaso militar significou o comezo dos Séculos Escuros para Gales.

A figura de Owain Glyndwr foi rescatada como heroe nacional a finais do séc.XIX polo movimento galesista, ao igual que fixeron os galeguistas con Pardo de Cela, mais o seu estandarte histórico non se popularizou ata o ano 2000, coincidindo coas celebracións nacionais do 600 aniversario do seu levantamento.

Desde as conmemoracións do ano 2000, o estandarte histórico de Owain Glyndwr converteuse rápidamente nunha bandeira moi popular en Gales, sendo hoxe común de ver esta enseña ondeando en eventos deportivos e folclóricos.


Voltar á Páxina Principal